Sa interview sa DXDC RMN Davao kang PSSG. Alfie Asan, ang traffic investigator sa Matanao Municipal Police Station, iyang gibutyag nga mi-surrender ngadto sa Talomo Police Station ug nahatod na sa ilang buhatan ang nakabangga sa biktimang nakabsan sa kinabuhi nga si John Paul Canque, 20 anyos ug uyab niini nga anaa na karon sa luwas nga kahimtang.
“Nag-uban ni sila gikan sa pikas na dalan, nitabok kay padulong na sa ilang boarding house. While nagatabok sila, didto sila nabanggaan. Makig-settle sila [pamilya] kay nakabalo man sila nga nadisgrasya gyud kay kadto nga area ngitngit, itom ilang suot tanan, alanganin pud ilang pagtabok. Naigo gyud, disgrasya gyud siya,” saysay sa imbestigador.
Sumala kang Asan nga naabtan pa og sobra duha ka oras ayha nakita ang mga biktima tungod sa kahilit ug kangitngit sa lugar.
Sa pakighinabi sab sa DXDC RMN Davao kang Jiel-liane Mamites, iyaan ni John Paul, walay kabutangan ang ilang kasubo karon tungod sa kalit nga panghitabo samtang giasikaso na ang patay nga lawas sa batan-on.
RadyoMaN Ivy Parido
