General Santos City—Patay ang mag-uyuan human nisukol sa nahitabong Operasyon sa kapulisan nga sakop sa Regional Police Drug Enforcement Agency sa may Purok Sarif Mocsin, sakop sa barangay Baluan, alas 2:00 ang takna kaganinang kaadlawon.
Ang mga namatay giilang silang si Sadat Suib, legal age ug Dulang Calay, legal age, pulos residenti sa maong lugar.
Sumala ni Dimple Muhammad, kabanay sa duruha nga sila nakurat nalang dihang nakadungog ug buto sa pusil ug dihang ilang gisuta ila nalang nasayran nga gisulod sa kapulisan ang balay sa iyang uyuan nga si Suib ug ig-agaw nga si Calay.
Kadismaya usab ang ilang gibati human nga nasayran nga patay na ang mga nasangpit. Giangkon ni Dimple nga nalambigit ang duruha sa iligal nga droga apan iyang gipaklaro nga nabag-o na ang mga nahisgutan ug gani usa kini sa mga nigraduate sa Programa sa gobyerno sa matag barangay nga gatabang sa mga drug surfacing personality.
Nasayran nga nadala pa sa ospital ang duruha apan gideklara nang dead on arrival.
