Naghinam-hinam na ang mga kabataan sa probinsya sa Sarangani nga saksihan ang magarbuhon nga provincial culmination program sa Linggo ng Kabataan sulod sa compound sa Kapitolyo sa Sarangani karon na gyung adlawa, adlaw nga Sabado.
Sa pag-ayuda sa dugay ng partner sa Sulong Sarangani flagship program ni Governor Steve Chiongbian Solon nga usa ka global humanitarian organization nga mao ang World Vision, muabot unya sa Kapitolyo ang sikat nga mga mang-aawit sa henerasyon karon sa mga kabataan gitawag nga Perkins Twins. Sila kadtong duha (2) kabuok mga gwapong kambal nga mga Fil-Am kon Filipino-American pop sensations gipanganlag Jesse ug Christian Perkins. Musabay ang Perkins Twins sa mahitabo nga battle of the band unya sulod sa Capitol Gym. Daghan pang kalingawan sama sa hip hop dance competition.
Tungod sa balaod nga Sangguniang Kabataan Reform Act/Republic Act Number 10742, gisibog ang pag-obserba sa Linggo nga Kabataan gikan Disyembre nahimo na kining Agosto aron sabayan ang kasaulugan sa International Youth Day.
Sa maong balaod, gitagaan og dakong bili ang pagpili sa mga boy and girl officials, hinungdan nga gimugna sa Sulong Kabataan program ni Governor Solon gidumalahan ni Youth Coordinator Bimbo Tablazon, katugbang ang Provincial SK Federation gipangunahan ni Board Member Reymar Dian, ang SJO kon Sarangani Junior Officials, sa pagsuporta nila Senador Manny ug Congressman Ruel Pacquiao, Vice Governor Elmer De Peralta, mga board member ug mga mayores.
Anaa na sa ikatulo katuig nag-host ang Kapitolyo sa SJO, ug karong tuiga mainiton nga gipili sa mga kabataang Sarangan sila Roland Keith Ochavo, John Hetler Ibarra ug Kyle Cherifaith Bago nga maoy ilang little congressman, little governor og little vice governor, kuyog ang trese (13) kabuok little board member.
Si Ochavo ang Grade 12 sa Alabel National Science High School, samtang si Ibarra ang Grade 12 sa James L. Chiongbian National Trade School, ug si Bago ang Grade 12 sa Malandag Malungon National High School.
Segun ni Junior Vice Governor Bago, nausab ang iyang perspektibo human nakaapil sa Sarangani Junior Officials 2019. Sulod sa usa lang ka semana, dako na matud pag kausaban sa iyang mga panglantaw sa kinabuhi og sa isig ka-kabataan.
Naba-id usab matud pa ang leadership skills niya ug sa mga kaubanan human nadunggan ang nindot nga mga pagtulun-an ug inputs gikan sa batikan nga mga resource person, sama na lang matud pa sa kapikas sa kinabuhi ni Governor Solon nga si Maam Michelle Lopez Solon, Board Member Joseph Calanao, Provincial Assistant Department Head Sittiehawa Marohomsalic, ug daghan pang personalidad sama ni ABS CBN Gensan TV Host Rhyndyll Faye Bartolaba.
Personal gidayig sa batan-on nga si Bago ang pamunuan ni Governor Solon. Nakig-isturya matud pa kanila ang Gobernador ug gihagit sila nga mga youth leader nga ipatigbabaw ang edukasyon sa mga kabataan tungod kay dili lang matud pa kini muhatag og solusyon sa kapobrehon kundili muhatag pa og daghang oportunidad.
