Davao City – Nagpasidaan karon ang usaka seminary counseling professor nga kuwidaw kita sa nanghinobra nga emosyon bunga sa isyung investment schemes / scams kay kung dili gayod makontrolar ang gibating kahiubos, posibleng mosangpot kini sa depresyon diin malagmit usab nga mosangko sa pagtubok kun paghunos sa kinabuhi gumikan sa kawalay paglaum sa unahan.
Matud ni Agni May Pernes, Koinonia Theological Seminary Foundation counseling professor, ang emosyon sa mga tawo karon resulta sa nagsagol nga kahingawa ingon man kasuko tungod sa pagpasirado sa mga investment schemes nga ilang giapilan.
Apan walay laing mahimo ang mga sakop sa Kabus Padatoon (KAPA) Community Ministry International Incorporated ug ang mga investors sa ubang mga investment schemes gawas sa pag-apelar na lamang ngadto kang Pres. Rodrigo Duterte nga dunggon ang ilang hangyo nga mahibalik ngadto kanila ang ilang na-invest nga kwarta.
Tambag sa maong eksperto ngadto sa mga investors nga tudloan ang kaugalingon sa pagdawat sa nahitabo ug dasigon ang kaugalingon nga dili pa katapusan sa kalibutan ug ang tanang nawala nga kwarta puwede ra kining mabalik pag-abot sa panahon ilabi na kung maningkamot uban ang dakung pagsalig ngadto sa Diyos.
Gi-awhag usab ni Pernes ang mga kabanay nga kung aduna sila’y mamatikdan nga simptomas sa depresyon diha sa sakop sa ilang pamilya, gilayon istoryahon ug paminawon ang ilang kahigwaos aron mugawas ang ilang gibati o dili ba kaha mas maayong dad-on ngadto sa eksperto aron matambalan ang kasakit sa ilang kasingkasing sa ingon maka-move on ug makalimot sila sa nadangatan sa ilang salapi diha sa mga problemadong investment schemes.
RadyoMaN Joel Viray
