Nasapwan nga wala na sang kabuhi ang tatlo ka magbarkada nga nakagapos ang kamot sa Purok 2, Brgy Bentung, Polomolok, South Cotabato, alas 9:00 kahapon sang aga, Oktubre 4, 2021.
Ginkilala ang mga biktima kanday Eros James Datwin Benosa, 18y/o, single, estudyante, residente sang Purok 6, Brgy Sulit, Polomolok, Carlene Loyd Hojilla Huelar 22y/o, single, residente sang Crossing Sulit Purok 8 Brgy Sulit, Polomolok kag Jayson Fiang Endencio, 25y/o, single jobless kag residente sang Purok 1 Brgy Lapu, Polomolok.
Suno kay PLt/Col. Alex Joe Orcajada, Chief of Police sang Polomolok MPS, magapadulong sa Melango resort sa T’boli ang mga biktima sakay sa Kawasaki Bajaj 100 motorcycle, color red, may plate number MC 5925, apang wala nakapauli ang tatlo sa ila balay sang Oktubre 3.
Base sa ila nga imbestigasyon suno kay PLt. Col. Orcajada si Eros James Datwin Benosa ang nakaangkon sang gunshot wound sa iya ulo, samtang si Jayson Fiang Endencio may gunshot wound sa likod kag si Carlene Loyd Hojilla Huelar ang nakaangkon sang labo sa iya kamot kag buno sa tiyan kag leog.
Nakuha naman sa lugar ang duha ka basyo sang ginaaligar kalibre 45 nga armas luthang.
Wala naman nakit-an ang ginsakyan nga motorsiklo sang tatlo ka mga biktima.
Pahayag ni Orcajada nga may grupo na sila nga ginatutukan nga responsable sa pagpatay sa magbarkada.
