TACLOBAN CITY – Ginpamumusil patay an magbugto ha Brgy. Mahayahay, Maasin City, Southern Leyte, alas 6:30 kagab-i.
Basi ha report han Police Regional Office 8, ginkilala an mga biktima nga hira PO2. Hifner Benecario Doble, may asawa ngan hi Trivor Benecario Doble, pareho nga residente ha Brgy. Mantahan ha nasabi nga syudad.
Ha nagawas nga inisyal nga imbistigasyon han mga otoridad, sakay hin tricycle an duha nga biktima tikang ha Matalom, Leyte tipakadto ha Maasin City proper ngan tigda nala nga may nag-overtake nga black pick-up nga sarakyan nga waray plate number.
Ginpa-uranan hin bala hin pusil an mga biktima rason han ira dayon nga pagkamatay.
Ha interview han RMN kan PCInsp. Ariel Nunez, Deputy Chief of Police han Maasin City, may mga death threats na nga nakakarawat an mga biktima pira kasemana an nakalalabay.
“Weeks ago, may mga threats na hira nga nakakarawat, maaram na hira kun hin-o an suspek o naghuhulga ha ira pero diri pa ini naton yana masiring kun adto ba nga suspek an nagpatay ha ira.”
May ginkakaptan na nga mga persons of interest an Maasin City Police han pagkamatay han magbugto.
Dugang ha pamahayag ni Nunez, makokonsidera nga gin-ambush an mga biktima.
20 nga basyo han bala han M16 an nakumpiska ha crime scene.
Ha impormasyon nga nakuha han RMN, myembro han Maasin City Police Drug Enforcement Unit hi PO2. Hifner Doble antis ini ma-assign ha Matalom, Leyte pero padayon an imbistigasyon han mga otoridad ngan ginkikita an ngatanan nga anggulo han pagkamatay han mga biktima.
