Davao City – Diriyot nagkagubot ang haya sa usa ka minatay human nagdinunggabay ang duha ka lalake kinsa pareho naglamay dihang nangahubog na sila alas 2:30 ganinang kadlawon.
Nakahiagom og samad dinunggaban sa dughan nga bahin si Joseph Delos Santos, 37 anyos ug residente sa Crossing Bago Aplaya Dumoy, Toril ning dakbayan human giluba sa iyang kainom sa lamay.
Sa wala pa nahitabo ang krimen, nagsige pa og kinataw-anay ang biktima ug ang wala gi-nganlan nga suspek apan pipila ka minuto nakabalay kalit nagkabikil ang duha tungod sa usa ka hisgutanan.
Giingon nagkumpiyansa si Delos Santos niadtong tungora gumikan sa pagtoo nga dili na mubalik ang suspek human kini mipa-uli sa ilang panimalay sa mao nga lugar.
Apan wala damha sa biktima nga mubalik diay ang suspek ug nagdala na og kutsilyo.
Base sa testimonya sa mga testigo nga walay daghang istorya giluba sa suspek ang biktma tumong sa tuo nga bahin sa dughan niini ug kamot.
Abtik mikagiw ang suspek sa wala matino nga lugar samtang si Delos Santos paspas gisalba sa mga tawo paingon sa Southern Philippines Medical Center (SPMC).
RadyoMaN Joel Viray
