General Santos City—tingkagol na karon sa silda sa Police Station 7 ang maglive-in partner human kining nakuhaan ug 3 ka kilo nga dahon sa marijuana atol sa gihimo operasyon sa may 39.2, Barangay Fatima, Gensan, alas 5: 45 ang takna kagahapong adlawa, Pebrero 22, 2018.
Giila ang mga suspek nga silang si Jay Ford Bayorle, 30, residenti sa Purok Acharon, Barangay Apopong, Gensan ug Salvacion Ali, 37, ug residenti sa nasangpit nga lugar.
Nakuha sa posisyon sa mga suspek ang 15 ka bundle sa gituohang dahon sa Marijuana nga gibana-banaang anaa sa (3) ka kilo ang gibug-aton.
Subay sa report sa Police Station 7 pinaagi ni Police Sr. Inspector Fernando Manuel, Chief Of Police nga dugay na nilang gimonitor ang mag live-in partner gumikan sa mga report nga matud pa lambigit ang duha sa pagpamaligya ug marijuana.
Dihang nataymingan sa kapulisan, gilayon nga gilusad ang operasyon nga miresulta sa pagkasikop sa mga nasangpit.
Sa karon ang mga suspek balhog na sa silda sa Police Station 7 samtang gikatakda silang pasakaan ug kasong kalasan sa R.A 9165 karong adlawa.
