Davao City – Padayon pang ginakuha sa Office of Civil Defense kun OCD-XI ang impormasyon og aduna bay natalang damyos sa nahitabong magnitude 4.3 nga linog sa Davao occidental kagahapon sa udto.
Sa pakighinabi sa DXDC RMN Davao sa OCD XI, naghulat pa sila sa datos gikan sa probinsya kabahin sa maong pagtay-ug diin kahinumduman nga mitay-ug ang maong linog alas 12:36 sa udto nga adunay gilay-un nga 39 kms sa sidlakang bahin sa Jose Abad Santos, Davao Occidental ug adunay giladmon nga 146 kms.
Subay kini sa record sa Philippine Institute of Volcanology and Seismology (Phivolcs) diin tectonic ang tinubdan sa maong linog.
Dugang sa record sa Phivolcs nga walay laumang damyos ug aftershocks niini apan padayon gihapon ang koordinasyon sa OCD XI ngadto sa disaster management sa Davao Occidental.
Matud sa OCD XI nga ilang ginapakusgan ang mga aktibidades kalabotan sa pagpangdandam ug unsay angay buhaton og adunay linog.
Kahinumduman nga niadtong adlawng Domingo, mitay-ug ang usa ka magnitude 7 nga linog sa Lomboc, Indonesia nga gikamatay sa kapin usa ka gatus ka mga tao.
RadyoMaN Renz Barbarona
