Davao City – Walay dagkong damyos nga natala sa mitay-ug nga Magnitude 6.4 nga linog alas 11:23 kagabii, adlawng Domingo (September 6, 2020) sa Don Marcelino, Davao Occidental.
Kini subay sa inisyal nga report sa Office of Civil Defense o OCD-XI.
Atol sa pakighinabi sa DXDC RMN Davao kang OCD XI Info Officer Angielina Payosalan, gibutyag usab niini nga wala pa silay nadawat nga report nga dunay naangol sa maong pag tay-ug.
“Sa pagkakaron, ongoing ang rapid damage assessment. So far sa initial nga pag-asses kagabii human sa linog wala man tay na report nga major damages particularly sa epicenter (Don Marcelino),” segun ni Payosalan.
Dugang niini nga offshore ug dili sa land area nahitabo ang linog ug wala usab na-monitor nga tsunami warning.
Pahinumdom sa OCD XI nga kanunay mangandam ug mag-amping gumikan dili matag-an ang linog og kanus-a mutay-ug.
RadyoMaN Renz Barbarona
