Davao City – Padayon karon ang gihimong monitoring sa Office of the Civil Defense (OCD) XI kabalot sa nahitabong 7.1 magnitude nga linog sa Davao Region.
Sa pakighinabi sa DXDC RMN Davao kang Franz Irag sa OCD-XI, gibutyag niini nga wala pa silay nadawat nga reported damages sa linog ug anaa pa sa normal ang lebel sa kadagatan sa kasamtangan.
Padayon usab karon pag monitor sa local Disaster Risk Reduction and Management Council (DRRMC) sa tibuok rehiyon labi na sa mga coastal barangay labi na sa gipagawas sa PHIVOLCS nga sea level disturbance.
Gibutyag usab ni Irag nga nagpahigayon na ang otoridad sa Davao Oriental og rekorida o information dissemination partikular na sa Governor Generoso ug Mati City asa mi-sentro ang linog sa pagpahibalo sa publiko nga hugot nga gibawal ang pagligo o pagpundo daplin sa kadagatan.
Sa karon wala pay gipahigayon nga preemptive evacuation sa tibuok rehiyon apan aduna nay naka-andam nga mas taas nga lugar ugaling adunay mando gikan sa otoridad.
RadyoMaN Kirby Manzon
