Isulan, Sultan Kudarat – Patay ang magpaka-isa sa natabo nga pagpamomba sa isa ka internet cafe sa Isulan , Sultan Kudarat alas 7:30 kagab-i , Septyembre 2.
Ginkilala ang mga biktima nga sanday Jun Mark Palencia Luda ,18 anyos , isa ka architecture student kag si Marialyn Luda nga lunsay may mga himata sa Passi City.
Sa interview sang RMN Iloilo sa pakaisa ni Jun Mark nga si Jennylyn , nagtawag si Marialyn kay Jun Mark agud magpabulig sa iya assignment .
Suno kay Jennylyn, iya pa gindul-ong sa internet cafe si Jun Mark apang wala ini naghunahuna nga amo na yadto ang katapusan nga tion nga makita ang pakaisa.
Ginpahayag ni Jennylyn nga nabalitaan na lang nila nga may naglupok nga bomba sa Isulan kag daw indi makapati nga isa ang iya pakaisa sa mga biktima.
Suno kay Jennylyn may buslot ang ulo , pilas sa liog kag likod ang naangkon ni Jun Mark samtang nawasak ang tiil kag nagkala-utod ang tina-e ni Marialyn.
Madumduman nga sang Agosto 28, may naglupok man nga improvised bomb sa Barangay Kalawag 3 kon sa diin, tatlo ka tawo ang patay samtang 36 ang pilason.
(photo via Jun Mark Luda Facebook account)
