Davao City – Wala na kauli pa nga buhi ang tulo ka indibidwal human nagpalit og pagkaon gumikan natabunan kini sa yuta sa nahitabong landslide sa Brgy. Nuing, Jose Abad Santos, Davao Occidental niadtong adlawng Domingo, July 14, 2019 apan ang mga patayng lawas nakita kagahapong adlawa, July 15, 2019.
Giila ang magpamilya nga sila Efrencio Serna Sr. 53 anyos, (Bana), Mateya Serna 53 anyos, (Asawa) ug anak niini nga si Efrencio Serna Jr., 23 anyos.
Sa initial nga report, sa dihang miagi ang tulo sa ilang ginaagian, midahili matud pa ang yuta sa babaw sa bukid hinungdan nga natabunan ang mga biktima.
Sa karon, gitabangan sa lokal nga gobyerno sa Jose Abad Santos (JAS) ang kabanay sa mga namatay sama sa financial assistance ingon man scholarship sa nabiling anak sa usa sa mga biktima.
Subay niini, nagsugod na usab og buhat og luwas nga agianan sila JAS Mayor Jason John Joyce ug mga brgy. Leaders aron masigurong luwas nga mag-agian ang katawhan sa nasangpit nga komunidad.
RadyoMaN Renz Barbarona
