Davao City – Dead on arrival ang usaka menor de edad human nabanggaan ang gisakyanang motorsiklo sa usa ka utility van sa Purok 4, Barangay Kapatagan, Laak, Davao de Oro alas-6 sa gabii niadtong Domingo (October 17, 2021).
Sa interbyu sa DXDC RMN Davao kang Police Staff Sergeant Roel Rico, imbestigador sa Laak Municipal Police Station (MPS), gibutyag niini nga magsiligan ang duha ka lalaki, pulos 16-anyos nga taga Purok 1, Brgy. Bagong Silang, Laak, Davao de Oro nga walay mga lisensya, dokumento sa motor ug helmet.
Naila ang driver sa van nga mao si Dexter Tugade, 38-anyos, taga Kabacan, North Cotabato nga bag-o lang driver sa pamasaheroang van, rotang Laak-Tagum.
Saysay ni Rico nga gikan Laak padulong Kapatagan ang van nga mag-remit na unta og renta sakyanan sa dihang kalit na lang kining nag-left turn hinungdan nga nagbaton og head-on collision sa kasugat nga motor nga kusog usab ang dagan nga miresulta sa pagkalagpot sa angkas nga maoy namatay samtang injuries ang naangkon sa driver.
Gipanawagan sa Laak MPS sa tanang mga motorista nga mag-amping sa pagbiyahe diin nasayrang nagkataas ang insidente sa bangga sa munispalidad.
“Panawagan lang namo sa amoang mga motorista diri sa Laak nga mag-amping gyud kanunay sa atoang pagbiyahe, labi na gyud sa kadtong mga batan-on nga wala pa gyoy mga lisensya. Kay mostly man gud, sila maoy kusog kaayo mupadagan. Usahay, mag lumba-lumba pud diha sa karsada,” sulti sa pulis.
Andam nga mutubang ang kapulisan sa pagkiha sa driver apan matud sa pamilya sa biktima nga makig-areglo na lamang kini o magbaton og internal agreement.
RadyoMaN Kirby Manzon
