Davao City – Parehong gipangdala sa Southern Philippines Medical Center (SPMC) ang duha ka managsoon nga nag away tungod sa kahubog nga miresulta sa pagpanigbas ug pagpangdunggab alas 7:00 ang takna sa kagabhion.
Ang mga managsuon nga parehong samaran mao sila si Roy Cabalhin, 26 anyos, usa ka mason ug Renen Cabalhin, 37 anyos, usa ka aircon technician, pulos nagpuyo sa Purok 11 Barangay Ula Tugbok District, Davao City.
Sa blotter sa Tugbok PNP, nanihapon ang managsuon ug kalit lamang nagbikil sa istorya ang duha diin misangko sa sinumbagay ug daling giuwang sa ilang amahan.
Apan wala pa matagbaw ang maguwang kinsa mikuha og kutsilyo dayong dunggab sa iyang manghod nga naigo sa dughan.
Nakahimo pa ang manghod sa pagbawos pinaagi sa pagkuhag lagaraw ug gitigbas usab iyang maguwang sa bukton niini.
Daling gipangdala ang duha sa SPMC aron kadapatan og medical nga atensyon samtang ang Tugbok PNP nagpadayon sa ilang imbestigasyon.
RadyoMaN Erin Lumosbog
