Magsuong menor nga naligo’g dagat, nalumos-patay

Davao City – Padayong giimbestigahan sa otoridad ang pagkamatay sa duha ka magsuong menor de edad human kini nalumos sa dagat sa Cayaponga, Jose Abad Santos (JAS), Davao Occidental niadtong Biyernes, May 31, 2024.

Sa interview sa DXDC RMN Davao kang Emmanuel Lumayno Jr., personahe sa JAS Municipal Disaster Risk Reduction and Management Office (MDRRMO), iyahang gibutyag nga ang mga biktimang minors usa ka babae nga nag-edad 7 anyos ug manghud niining lalaki nga 5 anyos.

Saysay ni Lumayno nga subay sa report, nangaligo sa dagat ang mga bata ug posibleng nadala ang nahisgutan sa dagkong balud, rason sa ilang pagkalumos.

“Estudyante daw sila didto sa Barangay Cayaponga pero kadto nga time, walay klase kay human na man daw ang klase ato. Nangaligo lang gyud daw sila unya wala nakabalo ang ginikanan nga nangaligo sila’g dagat. So possible nga naa silay kauban nga lain pud nga mga bata,” saysay ni Lumayno.

Gisulayan pa og tabang ang mga biktimak, apan nakabsan na ang nahisgutan sa ilang kinabuhi. Napaghibalo na usab ang insidente sa ilang ginikanan nga nagpuyo sa Barangay Sugal sa maong munisipalidad.

RadyoMaN Kirby Manzon