Dinas, Zamboanga del Sur – Patay ang padre de pamilya sa pamilyang Alangcas dihang gipusil sa wala mailang suspetsado alas 4:30 kaganihang kadlawon sa Purok Mangga, Barangay Nangka, Dinas, Zamboanga Del Sur.
Giila ang mga biktima nga sila si Jonathan Alangcas ug kapikas niini nga si Jenevy Alangcas.
Sa inisyal nga imbestigasyon nasayran nga samtang nagbyahe ang magti-ayong gikan sa lungsod sa San Miguel paingon sa lungsod sa Pitogo sakay sa Payong-Payong nga motorsiklo nga nagtangag sa plaka numero 090110 kalit kining giatangan sa armadong suspetsado pag-abot sa National Highway sa Brgy. Nangka sakop sa lungsod sa Dinas.
Upat ka higayon nga gipusil sa mga suspek ang biktima nga si Jonathan Malingtang nga nakahiagom sa duha ka samad pinusilan sa iyang tiyan ug dughan nga miresulta sa hinanali niini nga kamatayon.
Samtang dali nga gidala sa ospital ang asawa niini nga si Jenevy nga nakabaton og samad pinusilan sa iyang too nga bukton.
Naglusad na og hot pursuit operation ang kapulisan sa Dinas ug kasikbit nga lugar alang sa posible nga pagdakop sa nisibat nga mga suspek.
