General Santos City- Gikarnap ang usa ka skygo 125, kolor itom ug puti kagabii bandang alas 7:15 sa National Highway, Barangay Crossing Palkan, Polomolok, South Cotabato.
Ang maong motor gipanag iyahan ni Junnah Sebigan Abraham, 24 anyos, dalaga ug empleyado sa CAMPCO, Polomolok nga gimanehoan ni Juan Carlo Mancera Sevilla, 31 anyos, minyo ug lumulupyo sa Barangay Crossing Palkan, Polomolok, South Cotabato.
Subay sa pahayag sa biktima nga gabyahe sila sa iyahang asawa nga si Dee Ann Mancera Sebigan gikan sa palengke sa Polomolok pauli sa ilahang panimalay , mihunong sila kadali aron nga iplastar ug tarong ang ilang mga kargamento apan kalit lang miduol ang duha ka mga lalaki kansa mituon ug pusil kanila dungan sa pagdeklara ug karnap.
Daling gikuha sa mga suspek ang motorsiklo sa mga biktima dayon misibat padulong sa Barangay Koronadal Proper sa maong munisipyo.
Gilayon nga nagpahigayon ug hot pursuit operation ang Polomolok municipal Police didto sa lugar apan wala na maabtan pa ang mga suspek. Ang kapulisan sa Polomolok duna nay gitumbok nga suspek sa maong pagpangarnap.
