Davao City – Samdan ug bun-og ang mag-asawa human sila kulataha ug dunggaba sa grupo ni Dagul gawas sa ilang balay sa Sasa kagabii.
Hinoon naa na sa luwas nga kahimtang ang magtiayon nga mao sila Miguelito ug Maria Bernadeth Sarmiento residente sa Crystal Meadows Village, Sasa human sila tambali ni Dr. Cabahug sa Southern Philippines Medical Center.
Ang mga biktima gikulata ug giluba nila ni Noel Aquino, Junrey Laput, Jay-R Sharot, Evan Laput alyas Dagul,ug pulos nagpuyo sa Km. 11 Sasa ning dakbayan.
Suma sa imbestigasyon sa Sasa PNP, hubog ang mga suspek human sila namista sa lugar sa mga biktima.
Nagmaoy matud pa ang upat tungod mismo sa balay sa magtiayon mao nga migawas si Miguelito aron badlungon ang upat.
Ang suspek nga si Junrey mikuha og buak nga botelyo dayon luba tumong sa kilay sa biktima.
Nakigsinumbagay ang biktima kang Junrey apan miresbak ang tulo ug gitabangan og kulata si Miguelito hinungdan nahapla kini.
Dihang nakita sa asawa nga si Maria Bernadette ang nadangatan sa iyang bana migula kini aron ulangon ang iyang biktima ug ang mga suspek.
Pagduol Maria Bernadette, mipunit og bato si Alyas Dagul ug dayon hampak sa agtang sa biktima.
Abtik mikagiw ang mga suspek dihang nabantayan nila nga nanawag og pulis ang igsoon ni Maria Bernadette.
Dali gidala sa SPMC ang mga biktima ug naglusad na sab og manhunt operation ang kapulisan batok sa mga suspek.
RadyoMaN Joel Viray
