North COtabato–Usa ang namatay ug usa ang grabeng nasamdan sa pagpamusil sa probinsya sa Cotabato.
Nailhan ang namatay nga si Joel Hernane,37 anyos, samtang grabe nga nasamdan ang iyang asawa nga si Melba Hernane,39, mga residente sa Sitio Bobonao, Brgy Agriculture, Midsayap Cotabato.
Sumala pa kay Midsayap Chief of Police,Supt. Joan Maganto nga nag-inom ang mga biktima ug mga suspek nga mag-amahan nga sila Alder Flauta, 30 anyos ug si Ador Flauta, 64.
Sa diha nga sila nangahubog, sila nag-kambyuhanay ug hait nga pulong gumikan sa kanhi nilang bangi sa dugay nang panahon.
Tungod sa kasuko, kalit nga mibunlot ug pusil ang mga suspek ug gipumusil ang magtiayon.
Ang biktima nadala pa sa balay tambalanan apan namatay gihapon si Joel Hernane tungod sa mga samad pinusilan sa iyang ulo, likod ug dughan samtang ang iyang asawa anaa sa kritikal nga kondisyon sa balay tambalanan.
Malampuson usab nga nasikop si Ador Flauta apan nakaikyas ang iyang anak nga si Alder Flauta.
Sa pagkakaron, padayon pang giimbistigahan sa kapulisan ang maong insidenti.
