* Tagtakda ilubong na kuman ala-1:00 sa hapon an namatay na magtiayong Jhunrey ug Genipher Labandero sa disgrasya sa Payawan 1, Brgy. Luna, Surigao City. An paghatud sa katapusang kapahulayan an himoon sa Public Cemetery.*
* Kon kahinumduman, adton Dominggo Enero 28 sa alas 6:30 sa gabii, kalit na mibangga an tagsakyan na tricycle nan magtiayon kaiban an duha ka anak ngadto sa wingvan van na nagpa-gasolina sa isa ka gasoline station. Tagtudlo na nawad-an nan preno an tricycle ug nag-wild an makina sa dihang naglugsong sila gikan sa taas na bahin nan dayan kilid sa Mines and Geo-Sciences Bureau.*
* Dead on the spot an magtiayon samtang an mga anak na 2 ug 5 anyos an nakaangkon nan mga bun-og sanan samad sa uyo sanan iban na bahin sa lawas. *
* Sumaya pa ni Mirasol Padao Gabayan, an inahan ni Genipher, kagabii an katapusang vigil sa duha na kon diin maarang na tawo an miduyog ug mipaabot nan pahasubo ngadto sa ila pamilya. Tag-angkon na naglibog pa sija kon unoy sunod na lakang human sa paglubong labi na kay sija an tagtakda na mag-amuma sa nabiling mga apo.*
* Tagpaabot niini an pasalamat labi sa mga naunang mipadayag nan tabang ngadto sa ila pamilya.*
