General Santos City—gihuwat pa sa Polomolok Municipal Police Station ang pamilya sa magtiayong nabanggaan patay sa usa ka pampasaherong van sa National Higway, sakop sa maong lungsod niadtong nakalabayng adlaw alang sa pagpasang-at ug kaso batok sa driver sa van nga mibangga kanila.
Sumala ni Police Sr. Inspector Romeo Albano, Chief Investigator Sa Polomolok Municipal Police Station nga una nang nabangaan ang magtiayong silang si Fernando Alabado, 60 anyos ug Marcelliana Alabado, 59 anyos nga taga Barangay Magsaysay Polomolok sa van nga gimanihuan ni Albert Oria, 32 anyos nga taga barangay Lumakil.
Nasayran nga wala mabantayan sa driver ang mag-tiayon samtang sila nagtabok sa dalan mao nga iyang nabanggaan. gidala pa sa ospital ang duha apan gideklara silang dead on arrival sa Pagalungan Hospital.
Human sa insidenti buluntaryo man nga misurender sa iyang kaugalingon sa Polomolok Municipal Police Station ang van driver nga si Albert Oria dala ang gimanihuang van niini.
Subay sa pahayag sa driver sa mga personahe sa Polomolok Municipal Police Station, wala syay plano nga sibatan ang insidenti apan nahadlok lang matud pa syang makulatahan sa pamilya sa mga biktima.
Kaganina, duna nay inisyal nga panagsabot ang pamilya sa biktima ug pamilya sa driver apan wala pay tino nga desisyon kung pasakaan ba ug kaso ang driver o areglohon nalang ang kaso ug tugutan nga makagawas ang suspetsado.
