Pagadian City – Nagpalaban sa kapulisan ning syudad sa Pagadian ang magtiayon nga negosyante nag naglaraw nga mokandidato sa 2019 Mid-Term Election human kining nakadawat sa Pagpanghulga.
Alas 9:30 kagahapon sa buntag, nagpatala sa Pagadian City PNP sila si Maridel Maulana, 32 anyos, negosyante ug molansar sa pagka-Mayor sa lungsod sa Siay, Zamboanga Sibugay ug Gary Buendia, 51 anyos mokandidato usab sa pagka-konsehal sa maong gihapon nga lungsod.
Sumala sa sumbong sa magti-ayon nakugang nalang sila dihang gibanlan ug gituyo pagbutang ang sulat sa gawas nga bahin sa KCCP Hotel nga ilang gipanag-iyahan nga nakabase sa Brgy. San Jose ning Syudad.
Ang nakahasol sa mga magti-ayon mao ang napatik sa papel nga nag-ingong inihap nalang ang ilang adlaw.
Giimbestigahan na karon sa kapulisan alang sa posible nga pag-ila sa mga nihimo sa pagpanghulga ug apil nga gisuta ang kopya sa CCTV camera nga makatabang sa pag-ila sa nanghulga kanila o nibutang sa sulat.
