Calatrava, negros Occidental – Nadakpan na ang magulang nga lalaki nga naggulot sang liog sang iya mga manghod sa Calatrava, Negros Occidental kahapon , Hunyo 9.
Suno kay PSI John Joel Batusbatusan, hepe sang Calatrava Municipal Police Station , mismo ang mga residente ang nagdakop sa suspetsado nga ginkilala kay Junmark Melibo, 21 anyos sang Brgy. Marcelo kag ila ini gin turn-over sa kapulisan.
Ini matapos ila nakit-an ang suspek nga nagapanago malapit sa ila puluy-an pasado alas 6:00 kaina sang aga, Hunyo 10.
Santo sa impormasyon, mapauli subong nga adlaw ang iloy sang mga biktima agud makita ang iya mga anak nga amo sanday Gregor Melibo, 1 ka tuig, Alejandro Melibo, 5 ka tuig kag Jhorenz Melibo ,14 anyos nga yara na sa punerarya.
Madumduman nga ginpanggulot sa li-og ang mga biktima gamit ang plamingko sang ila mismo magulang nga may deperensya sa panghuna-huna.
Santo sa impormasyon, naga-hingyo ang suspetsado nga ma-eskwela subong nga Hunyo apang wala nakapa-enroll bangud sa kapigaduhon.
Ginpahayag nga nagapanakit ang suspek kun indi mahatag ang iya ginapangayo.
