LA CASTELLANA, NEGROS OCCIDENTAL – Daku karon nga palamangkutanon kon bala ano ang motibo sa natabo nga pagpamatay sang 3 na tanan ka mga baka kag isa ka karabaw sa Brgy. Robles, La Castellana sang nagligad nga Miyerkules kag Huwebes sang kaagahon.
Base sa imbestigasyon sang La Castellana Municipal Police Station, ang una nga insidente natabo sadtong June 6 sang kaagahon.
Nakibot si Aldren John Libres, legal ang edad kag pumuluyo sang Cadujada, Brgy. Robles sang iya nasapwan nga patay na ang iya isa ka baka kag isa ka karabaw.
Makaluluoy ang nadangtan sang mga kasapatan ni Libres bangud nga ini ang may agi sang lampos sang matig-a nga bagay sa ulo kag madamo nga pilas tuga sang pagbuno sa lawas sini.
Ang ikaduha naman nga insidente natabo sang June 7 sang kaagahon man gihapon kon diin nakibot naman si Wilfredo Gonzales, pumuluyo man sang Brgy. Robles sang iya nasapwan nga patay na ang iya duha ka baka kag isa ka karabaw.
Suno sa pulis, ang manera sa pagpatay sang kasapatan sang duha ang pareho gid lamang, ginlampusan kag ginpangbuno.
Samtang, apesar nga madulum gihapon ang imbestigasyon sang pulis, nakita nga duha ka mga tawo ang suspek nga may kahimuan sini bangud man sang nakita nga duha ka set sang footprints ukon tiil sa lugar sang insidente.
Sa bahin sang mga nagkalamatay nga baka kag karabaw, ginpahayag nga ini ang ginpa-ihaw na lamang sang tag-iya kag ginbaligya sa mga kaingod sa barato na lang nga presyo./Grace Supe/RMN photo
