DON SALVADOR BENEDICTO, NEGROS OCCIDENTAL – Ang tuman ka gutok nga classroom bangud sang naga-sulobra nga mga estudyante kag ang indi mentinado nga comfort room ang pila sa ginalantaw nga rason kon ngaa nagreklamo ang 16 ka mga estudyante sang isa ka high school DSB nga nabudlayan ang mga ini mag-ginhawa.
Ini kasunod nga may kapin 16 ka mga estudyante sang Sofronio Carmona National High School sa Poblacion ukon town proper sang Don Salvador Benedicto ang ginpangdala sa Municipal Health Office may mga las 10 kahapon sang aga bangud sa reklamo sang mga ini nga nabudlayan sila mag-ginhawa.
Nahibaluan, base sa pahayag ni Principal Elena Pillado nga ang tuman gali ka gutok sa classroom kon diin may 80 ka mga estudyante sa isa ka hulot nga dapat kuntani 40 lang ang unod rason nga mainit kag indi maayo ang ventilation.
Ini bangud man sa tuman ka kulang nga pasilidad bangud tubtub sa karon wala pa nahuman ang nasuguran na kuntani nga construction sang dugang mga classrooms.
Wala labot sini, posible wala man naagwantahan sang mga kabataan ang tuman ka baho sang banyo bangud kulang ini sa tinlo kasunod nga wala sang tubig sa amo nga eskwelahan.
Base sa findings sang doktor sang munisipyo, ang amo nga mga estudyante ang nag-batyag sang ginatawag nga Hyper Ventilation Syndrome, isa ka respiratory disorder kon diin ang isa ka tawo ang naga-ginhawa sang madalum ukon madasig.
Sa report nga ginpagwa sang DSB Municipal Police Station nahibaluan nga sadtong June 21, 2018 las 11 sang aga nakabaton sila sang tawag halin sa Municipal Health Office kag sa amo nga eskwelahan nga may 16 ka mga estudyante ang halos ang nagbatyag sang kabudlay sa pag-ginhawa.
Suno sa head sang DSB DRRMO Rodel Pamini nga nagsugod ang insidente sang nagligad nga Miyerkules sang aga kon diin may isa ka estudyante nga babayi nga nagreklamo nga indi maka ginhawa kag nagpalangtiskog.
Kahapon sang aga, liwat na naman nga nagluntad ang kaangay nga hitabo kon diin may 16 ka mga kabataan ang nagbatyag sang kaangay nga sintoma kag kaina sang aga, may dugang nga 7 pa gid ka mga estudyante nga nagbatyag man sang amo sini.
Sa 17 ka mga estudyante halin sa grade 7, 8 kag 10, 14 diri ang babayi naga edad 12 tubtub 15 anyos kag 3 ang lalaki, naga edad 13 tubtub 17 anyos.
Ini sila ang gindala tanan sa Municipal Health Office para mahatagan sang nagakaigo nga medical attention kag gin-release man matapos ginbulong.
Bangud sini, gindeklarar sang eskwelahan ang suspension sang klase las 9:30 kaina sang aga agud malikawan ang dugang nga pagluntad sang amo nga hitabo.
Sa pihak nga bahin, ginpasiguro naman ni DSB Mayor Marxlene Dela Cruz nga ginahimo na sang banwa ang tanan nga pamaagi agud mabuligan gilayon ang mga apektado nga estudyante kag masolusyunan ang problema sang eskwelahan./dyHB BACOLOD
