Pagadian City – Prisohan ang gipadulngan sa upat ka indibidwal lakip na ang usa ka tanod sa barangay human kining nasapon nga nagdula og mah-jong sa billiard hall sa Purok Rubia, Brgy. Sta. Maria ning syudad sa Pagadian kagahapong adlawa.
Gironda sa kapulisan ang billiard hall nga gipanag-iyahan ni Ben Bulog, dihang nakadawat og taho ang otoridad gikan sa impormante nga nagsugal og mah-jong ang upat ka mga suspek.
Nakugang ang mga suspek nga nalingaw na unta sa pagkupay sa mah-jong dihang largong gisita sa kapulisan.
Giila ang nadakpan nga sila si Mars Arroyo Tubigon, 36 -anyos, Barangay Tanod sa Brgy. Santa Maria, Albert Doremon Plata, 35 -anyos, Joel Gaudan Dela Rama, 40-anyo ug Rommel Duhilag Mag-Abo, 36 -anyos pulos lumulupyo sa nahisgutan nga lugar.
Nahipos sa kapulisan gikan sa mga dinakpan mahjong tiles, duha ka dice ug uban pang gamit apil na ang sugal nga mikabat sa P 816.00.
Paglapas sa Presidential Decree 1602 kun silot sa illegal nga pagsugal ang gi-atubang sa mga dinakpan.
