Maika-121 a Panagwaywayas ti pagilian, pinagkaykaysana dagiti umili ti Ilocos Norte

iFM – Simple ken naurnos ti selebrasyon ti Ilocos Norte iti maika-121 a panagwaywayas ti pagilian a Pilipinas.

Naaramid daytoy iti sangoanan iti kapitolyo ti probinsya nga inatendaran daytoy dagiti kameng ti Phil. National Police, dagiti kameng ti Bureau of Fire Protection ken dagiti dadduma pay a law enforcement agencies, dagiti beterano ti gubat, dagiti opisial ti probinsia pakairamanan dagiti opisial iti nadumaduma nga ili ken siudad ken dagiti empleado ti gobierno probinsial.

Indauloan da Bise Gobernador Angelo Marcos Barba, sumaruno a diputado iti maikadua a distrito ti Ilocos Norte ken ni incoming gov. Senior Sang. Panlalawigan Member Matthew Marcos Manotoc dagiti opisial ti probinsia a nagatendar iti daytoy naindaklan nga aldaw para iti intero a pagilian.


Kalpasan a naiwagayway ti bandera ti Pilipinas ket naisayangkat ti panagkararag, 21 gun salute ken ti pannakaidaton ti sabsabong iti sango ti monument ti nailian a banuar a ni Dr. Jose Rizal iti sangoanan ti kapitolio probinsial.

Naisaruno a dagus ti panangipaay ti mensahe ti bise gobernador ken ti sumaruno a gobernador ti Ilocos Norte ken kalpasanna ket naipaayan ti pammadayaw dagiti local legislators ti probinsia babaen iti Local Legislative Awards wenno ti LLA.

Bernard Ver, RMN News

Facebook Comments