Davao City – Andam sa tanang panahon ang lokal nga kagamhanan sa bisan unsang kalamidad sama sa uwan nga maoy hinungdan sa landslilde sama sa nahitabo sa Deca Homes Indangan diin duha ka pamilya ang hapit madisgrasya human nibirig ang ilang mga balay gumikan sa pagdahili sa yuta nunot sa pag-bundak sa ulan dinhi sa siyudad sa Dabaw.
Gibutyag ni Second District Councilor Dante Apostol nga hitsas na ang mga programa sa kagamhanang lokal kontra sa kalamidad diin kabahin sa unod niini mao ang pagluwas sa mga residente nga maigo sa baha ug pagdahili sa yuta.
Bisan tuod og dili malimod nga daghan gihapon ang nag-estar sa kabaybayunan, daplin sa sapa, ug kilid sa kabukiran nga sagad maigo sa kalamidad apan tungod sa komprehensibo nga disaster plan daghan ang maluwas gikan sa delubyo sa nagsalimuang nga kinaiyahan.
Segun pa ni Apostol, ensakto lang nga ipatawag sa hawanan sa konseho ang mga subdivisions developers sama sa Deca Homes kansang mga unit sub-tandard pagkahimo maong daghan sa mga homeowners ang nagreklamo.
Gikumpirma usab ni Apostol nga nagsugod na ang dagkung proyekto sa nasudnong kagamhanan alang dinhi sa siyudad ug sa tibuok Mindanao sukad pa sa miaging mga tuig.
Gani, sumala ni Apostol, ang Mindanao Railway System Phase 1 nasugdan na og trabaho sa Tagum City ug latas sa dinhi sa siyudad sa Dabaw hangtud paingon sa Digos City ug Davao del Sur.
Samtang miarangkada na usab sa miaging tuig ang Coastal Road Project nga nagsugod sa may Talomo area diin gilauman nga daku kining tabang sa pagsulbad sa suliran sa kaguot sa trapiko sa dakbayan kung makumpleto na unya ang proyekto.
Ang Mindanao Railway System Project ug Coastal Road Project nga gipondohan og binilyon ka pesos nga gikatakda mahuman sa tuig 2022 kabahin sa promesa ni Pres. Rodrigo Duterte sa nakalabay’ng 2016 election nga iyang paulanan og dagkung proyekto ang Mindanao kung makadaug kini sa piniliay sa pagka-pangulo sa nasud.
RadyoMaN Joel Viray
