Wala kapugngi sa kadaghanan sa mga taga-Sarangani Province nga makadayig og magpasalamat sa pamunuan ni Governor Steve Chiongbian Solon tungod sa daghan pang programa og proyekto ang nahidangat gikan sa nasyonal nga gobyerno og mga partner charity foundation taliwala sa nagpusot-pusot usab nga mga kalambuan nanglabay nga mga tuig og bisan pa nga unang quarter pa lang karon sa tuig 2019 og bisan na matud pa nga taliabot ang piniliay.
Pamatuod lamang matud pa nga gatrabaho ang mga opisyales may eleksyon man o wala, sa hugot nga pagsuporta nila Pangulong Rodrigo Duterte, Senador Manny Pacquiao og Congressman Ruel Pacquiao.
Apan walay laing nakita nga labing hinungdan sa natagamtaman nga tinusbawan karon sa probinsya sa Sarangani, og kana tungod matud pa sa makanunayon nga paghatag og pasidungog sa Labaw nga Makagagahum.
Nakita sa mag-asawang Governor Steve Chiongbian Solon og Ms. Michelle Lopez Solon nga tungod sa hiniusa og makanunayon nga mga pag-ampo, sa paghatag prayoridad, og sa paghatag kagawasan sa mga Kristohanon og sa tanang denominasyon maunsa mang relihiyon og tribo nga magkatapok aron pasidunggan ang Ginoo sulod sa unom (6) ka tuig hangtud ning panahuna, mas paspas og hilabihan usab ang mga grasya og panalangin nga gakaabot sa Sarangani Provice, lakip na ang malinawon nga palibot walay kagubot.
Maong sa Sarangani dili matud pa mabulag isip lig-ong partner sa kalinaw og kalambuan ang lokal nga gobyerno og religious community.
