Sarangani Province–Posibleng nakadawat ug sayop nga impormasyon ang kampo sa 73rd Infantry Batallion Philippine Army kalabutan sa gikaingong gisunog sa grupong new people’s army ang panimalay sa usa ka Sitio Leader nga si Fredo Manganyong sa Upper Suyan, Malapatan Sarangani Province niadtong milabay nga semana. Kini ang gibutyag ni Malapatan Masyor Salway Sumbo Jr.
Kahibaloan nga una nang gibutyag ni Lt.Jerry Maburang ang tigpamaba sa 73rd infantry batallion nga gisunog sa NPA ang panimalay sa Sitio Leader pinaagi usab sa nadawat niining impormasyon sa ilang mga sakop.
Samtang hugot man usab nga gihingusgan ni Mayor Sumbo sa Malapatan nga walay kamatuoran ang impormasyon nga gisunog sa NPA ang panimalay sa Sitio Leader human nga iyang gipa-verify sa iyang mga tawo ang lugar.
Gikakurat man usab ni Lt.Maborrang ang nahimong pamahayag ni Mayor Sumbo kalabutan sa panghitabo sumala pa niini nga ilaha usab ipa-verify sa ilang tawo kung unsa katinuod ang pamahayag sa mayor.
Samtang kabahin usab sa Sarangani Police Provincial Office pinaagi sa ilang tigpamaba nga si Police Lt.Col. Teody Condesa nga duna silay nadawat nga impormasyon kalabutan sa gikaingong gisunog ang panimalay sa sitio leader sa nasampit nga lugar ug ilaha pang gipaabot ang resulta sa imbestigasyon sa BFP ug sa kasundaluahan kalabutan sa maong panghitabo. (Reynald Timario)
