Mibalik na sa Low Risk ang status sa dakbayan sa Malaybalay kabahin sa sakit nga Covid-19.
Kini basi sa report nga gipagawas ni Dr. Dennis P. Sangalang, City Health officer sa Malaybalay City atol sa City Disaster Risk Reduction and Management (CDRRMO) Council Meeting kagahapon didto sa Veranda’s Place, Carmenville Subdivision, Brgy. Casisang, Malaybalay City.
Sumala ni Dr. Sangalang nga anaa nalang sa 0.16% ang Average Daily Attack Rate (ADAR) sa dakbayan sulod sa milabayng pila ka semana.
Dugang niya nga dako gayud ang nakitang pagkunhod sa mga natalang kaso sa Covid-19 kung itandi sa milabayng bulan.
Mitala og 863 ka mga aktibong kaso ang Malaybalay City hangtud Agosto 29, apan dako ang pagkunhod niini nga muabot sa halos 80% nga sa pagkakaron anaa nalang sa 153 hangtud adtong milabayng lunes.
Dako ang pagpasalamat sa dakbayan ngadto sa katawhan sa pagtuman sa mga sumbanang gitalaga batok sa Covid-19 ug hilabi na gayud sa pagpabakuna.
