Miuna ang dakbayan sa Malaybalay sa kinatas-ang ihap sa kaso sa Teenage Pregnancy sa tibook probinsya sa Bukidnon.
Kini basi sa report nga gipagawas sa Population and Development (POPDEV)-Bukidnon sa milabayng tuig 2019.
Sa maong report, mitala kining 581 ka mga kaso sa gisundan sa dakbayan sa Valencia sa 528 ug sa lungsod sa Maramag nga anaay 408 babayeng sayo namabdos.
Sumala ni Ms. Emily Marie Q. Estacio, Population Program Officer III sa POPDEV nga usa sa nahimong rason niining pagtaas sa kaso sa teenage pregnancy sa dakbayan sa Malaybalay ang kakulangon ug kahibalo kabahin sa angayang buhaton aron malikayan ang sayo nga pagkamabdos.
Gibutyag usab ni Estacio nga padayon ilang pagpahigayon og mga seminars ug konsultasyon sa mga babaying sayo namabdos aron mahibal-an ang saktong pagplano sa pamilya.
