Inanay nga nitaas ang ihap sa mga Person Under Monitoring sa siyudad sa Malaybalay.
Sa interview sa RMN ngadto kang Nene Belisario, ang spokesperson sa Inter-Agancy Task Force on COVID 19 sa Malaybalay, gibutyag niini nga gikan sa 4 niadtong nakalabay nga adlaw anaa na kini sa 15 as of April 29, 2020.
Gipasabot niini nga nibalik ug taas ang ihap sa PUM tungod kay gitugutan na sa probinsya ang mga na-stranded nga residente nga taga sa Bukidnon nga toa sa laing lugar nga maka-uli.
Sigun niya nga gimonitor kini ug ipailawom sa 14 day quarantine tungod kay gikan kini sa dapit kung asa adunay nagpositibo sa COVID-19.
Samtang gipahayag usab ni Belisario nga nakatala ang dakbayan ug usa ka probable. Kini usa ka sundalo nga adunay gibati o sintomas nga susama sa COVID-19.
Gi-obserbahan na kini karon ug naka-admit sa hospital.
Gipahibalo na usab ang mga kauban niini nga adunay direktang contact sa mao nga sundalo nga dili una mugawas sa gipuy-an samtang gi-obserbahan ang mao nga probable patient.
Giklaro niya nga nahimo kini nga probable tungod kay nakitaan ug sintomas nga duol sa COVID-19.
Wala pa usab silay final contact tracing sa mao nga pasyente.
Gipailawom na usab kini sa testing sa COVID-19 ug gihulatan pa karon ang resulta.
