Ang rehiyonal nga buhatan sa Departamento sa Lokal nga Pangagamhanan (DILG) pinaagi ni Regional Director, Paisal O. Abutazil, ang naga-awhag karon sa tanang mga Provincial Directors ug City Local Government Operations Officers (CLGOO), dinhi sa rehiyon 9 alang na sa halapad nga pagsangyaw sa unod sa memorandum gikan sa Local Government Academy (LGA) nga pinetsahan ug Abril 7, ning tuiga, kalabot na sa “Scholarship Invitation gikan sa Malaysian Technical Cooperation Programme”.
Sumala sa unod sa nahisgotang memorandum, nasayran nga kining maong inbitasyon ang gitanyag sa nasud sa Malaysia, diin bukas alang sa mga opisyales ug functionaries sa kagamhanang lokal lamang, ug matud pa, nga kinahanglan nga mopa-ilawom sa pagpili alang sa slot nga gilugway sa MTCP ngadto sa atong nasud.
Ang kurso nga gitanyag mao ang “Environmental Management and Pollution Control nga magsugod gikan Agosto 1 ngadto sa petsa 14, ning kasamtangang tuig, didto sa nahisgotang nasud.
Ang deadline alang sa pagsumte sa aplikasyon kalabot niini mao ang Mayo 15, samtang ang interview ang gikatakda sa Mayo 24, 2018, mga magasugod sa alas 9:00 ang
takna sa buntag.
Dugang nasayran nga kining maong programa ang nagatumong sa paghatag ug igong pagbansay-bansay kalabot sa nagkalain-laing pamaagi alang sa air quality management, pagbansay sa nagkalain-laing aspeto ug pamaagi sa water and marine pollution control, toxic ug hazardous waste management ug sa pagpa-ambit sa mga legal nga rekesitos alang sa kinatibuk-ang pagsusi sa kinaiyahan sa nasud sa Malaysia.
Matud pa nga ang nominee ang kinahanglan nga gi-nominar sa ilang gobyerno; adunay pinaka-menos usa (1) ka tuig nga kasinati-an dinha sa environmental management and pollution control, walay naka-binbin nga kaso admnistratibo o criminal, naghawid ug permanenteng posisyon; mayo mosulat ug mosulti sa pinulongang englis, nagbaton ug himsog nga paglangwas ug nagpangidaron gikan 50 anyos paubos.
Ang interesadong mosalmot ang gi-awhagan sa pagkontak ni Mr. Robert B. Belisario, sa DILG-CLGSC Secretariat sa tel. nos. (02) 634-1883 o 631-3893, o sa pagbisita lang dinha sa pinaka-duol nga buhatan sa DILG dinha sa inyong matag dapit.|CIO
