Davao City – Nagkahiusa ang mayoriya sa katawhan dinhi sa habagatan nga patubagon gayud si kanhi Presidente Benigno Simeon Aquino III sa kamatayon sa 44 ka mga operatiba sa PNP Special Action Force sa kamaisan ug kalibunan nga dapit sa Tukanalipao, Mamasapano, Maguindanao duha ka tuig na ang nakalabay.
Dakung parte sa mga radio listeners sa morning primetime radio social commentary program ‘RMN Straight to the Point’ nidason nga angay patubagon si Noynoy sa hukmanan aron pangutan-on nganong daghang misteryong naglimin sa ‘Oplan Exodus’.
Ang ‘Exodus’ gimontar aron i-neutralisa ang pinangita sa balaud nga international terrorist ug bomb expert nga si Zulkifli bin Hir alyas ‘Marwan.’
Parte sa rason sa mayoriya mao nga si Noynoy ingon man ang uban pang mga kadagkuan niadtong tungora sama nila ni suspended PNP Director-General Alan Purisima ingon man si PNP SAF Director Getulio Napeñas dili gayud maka-ikyas sa tagsatagsa nila ka mga responsibilidad sa makalilisang nga ‘botched operations’ diin napatay si Marwan apan bugti usab ang kinabuhi sa SAF 44.
Sa iyang kabahin, gisugilon ni Atty. Roger Largo, presidente sa Integrated Bar of the Philippines (IBP) Davao City-Davao del Sur chapter nga adunay basihan ang nahimong hukom sa Office of the Ombudsman pagkiha kun pag-indict kang Aquino gumikan sa pagmando kang Purisima nga i-supervise ang operasyon kontra kang Marwan.
Apan gitino ni Largo nga dili mamahimong lutoson si Noynoy sa direktang pagpapatay sa SAF 44 sanglit wala man naghatag sa mando o bin ba kaha pormal nga naglaraw ang kanhi hefe-ehekutibo nga patyon ang mga ginsakpan sa nasudnong kapulisan.
Gitataw ni Largo nga malisud lutoson si Noynoy ubos sa konsepto kun doktrinang ‘command responsibility’ sanglit applicable lamang kini kalambigit sa mga kalapasan diha sa civil governance and administration.
Kasamang June Duterte
tags: Mindanao, Davao City, DXDC, DXDC 621, Straight to the Point, June Duterte, SAF 44
