TACLOBAN CITY – Nadiskubrehan nga patay na an district manager han usa nga motorcycle company ha usa nga branch ha Ormoc City, Leyte kasangkulop, Marso 6, 2019.
Ginkilala an biktima nga hi Romeo Oledan, 43 anyos, district manager han MSS Cycle trading ngan taga Bontoc, Southern Leyte.
Nakakarawat hin report an police station 1 han Ormoc tikang ha ua nga concerned citizen nga mayada patay nga tawo ha sulod han MSS Cycle trading ha 471 Serafica Building, Lilia Avenue, Cogon, Ormoc City.
Pag-abot han mga kapulisan ha nasabi nga establisyemento, naabatan nira an patay nga lawas han biktima nga mayada dugo ha ulo ngan nakahigda ini ha salog.
Nabaruan nga ginpusil an biktima ha ulo nga dayon hini nga iginkamatay.
Nadiskubrihan pa han mga kapulisan nga hawan na an P21,800 nga salapi ha sakob han vault.
Sumala han Ormoc PNP, posible nga ginsugo han mga suspek an biktima nga abrihan an vault.
Narekober tikang ha crime scene an .45 nga pistol
Magpapadayon naman an imbisitgasyon han mga kapulisan agud mabaruan kun hin-o an mga responsable hini nga krimen.
