Nakaangkon ug lima ka mga samad tinigbasan sa nagkadaiyang parti sa iyang lawas ang 43 anyos nga biktima dihang giunay kini’g tigbas sa iya ra usab nga igsoon, alas 10 ang takna sa gabie.
Gidala sa balay tambalanan ang biktima nga si Rosarie Bercasio, 43 anyos, balo ug residenti sa District 4, Brgy. Sacol, Buenavista, Agusan del Norte samtang ang suspek giila nga si Joseph Depadua, hingkod ang edad ug igsoon ra usab sa biktima.
Nasayran nga gihulat sa suspek ang biktima nga mogawas gikan sa simbahan sa St. Vincent Ferrer Chapel ug sa dihang paggawas sa biktima walay langay nga gihapos sa suspek ug sundang sa makadaghang higayon.
Naalarma sa maong insidenti ang tanang misimba lakip ang Pari nga nagpahigayon ug santos nga misa sa nasaksihan nga insidenti human midagan pasulod sa simbahan ang biktima aron mangayo’g tabang.
Gikabutyag nga personal nga bangi ang motibo sa pagtigbas sa biktima human wala niya mataga-e ang suspek sa iyang gipangayong kwarta.
Human sa insidenti daling misibat ang suspek apan nadakpan kini sa gilusad nga hot pursuit operation sa Buenavista Municipal Police Station sa pagpangulo ni PMaj. Erwin Cordano lakip nga nakompiska ang sundang nga gigamit sa pagtigbas.
Sa karon nagtingkagol na sa karsel sa Buenavista MPS ang suspek ug nakatakdang pasakaa’g tukmang kaso. [image: tigbas.jpg]
