General Santos City—gideklarang dead on arrival sa Gensan Medical Center ang usa ka mananagat human kining giluba sa may Purok Estrella, Barangay Calumpang ning dakbayan.
Giila ang biktima nga si Norberto Apamo, 31, mananagat ug residenti sa nasampit nga lugar. Alas 11:00 ang takna sa gabie samtang nagbaktas ang biktima pauli na unta sa ilang panimalay, kalit lang matud pa syang gidasmagan sa suspek dayon gidunggab.
Nakaangkon ug samad sa iyang tuo nga bahin sa tyan ang biktima, nakadagan pa kini ug nakapangayog tabang sa iyang mga silingan kansa maoy midala kaniya sa ospital apan gideklara kining dead on arrival.
Sa karon padayon pa ang gihimong imbistigasyon sa Police Station 5 kalabutan sa maong insidenti ug ginasuta pa kung si kinsa ang suspek ug unsay motibo sa krimen.
