General Santos City—Patay sa pagpamusil ang usa ka mananagat nga nailang si Dennis Mercado, 39, residenti sa Upper Cawa, Barangay Mabay, Maitum, Sarangani Province alas 9:00 ang takna sa gabie sa nakalabayng adlaw.
Sa inisyal nga imbistigasyon sa maitum Municipal Police Station nasuta nga nanagat ang biktima uban sa iyang mga kaubanang mananagat sa baybayon nga sakop sa Melbok, Palembang, Sultan Kudarat dihang kalit lang matud pa nga mibutho ang duha ka mga suspek nga sakay sa pakura dayon gipusil ang biktima pila ka higayon nga hinungdan sa iyang kamatayon.
Swerti usab nga wala madamay ang duha ka kaubanan sa biktima nga sakay sab sa bangkang panagatan human silang paspas nakaambak.
Gilayon nga misibat ang mga suspek human sa insidenti, samtang ang biktima, gidala sa iyang mga kaubanan daplin sa baybayon sa Maitum dayon sila mireport sa kapulisan.
Sa karon nagpadayon pa ang imbistigasyon sa kaso ug nakig-alayon na usab ang Maitum PNP ngadto sa Palembang PNP bahin sa himuon nilang imbistigasyon sa nahitabong pagpamusil.
