Patay ang usa ka mananagat human mapusilan, pasado alas-7:00 sa gabii niadtong Sabado, tungod matud pa kay misukol kini sa mga pulis nga mag-serve unta sa search warrant, sa iyang panimalay sa Purok 7, Barangay Poblacion, Manticao, Misamis Oriental.
Matud pa sa usa ka police captain nga maoy nag-lead sa Tracker Team sa Regional Intelligence Division (RID) 10, napusilan nila ang target sa search warrant nga si Danny Ardiayon, 57 anyos.
Mihangyo ang maong opisyal nga dili nganlan tungod sa confidentiality sa iyang trabaho.
Kaso nga paglapas sa Republic Act 9516 o illegal nga paghupot og eksplosibo o armas ang kaso ni Ardiayon.
Wala na gisulti sa maong opisyal kung gi-unsa pagsukol ni Ardiayon, kinsa ilado sa maong lugar nga mogamit og dinamita sa pagpangisda.
Sa pagpangukay sulod sa panimalay, nakit-an ang chemical, detonating cords ug uban pang mga gamit sa pagbuhat og dinamita.
Aduna usay nakit-an nga hinimong dinamita ug duha ka putos nga gituohang shabu. (Divina M. Suson, July 13)
