Davao City – Mag-12 ka oras na karon ang pagpangita sa mga rescuers sa duha pa ka missing sa flashflood nunot sa kusog nga ulan sa Barangay San Ignacio, Manay, Davao Oriental.
Nahitabo ang flashflood kaganihang alas-4:00 sa kadlawon adlawng Martes.
Giila sa Office of the Civil Defense XI ang mga nagpabiling-missing nga sila Ariane Magbutong, 9 anyos ug Marilyn Maungat, 38 anyos.
Gibutyag ni OCD XI information officer Leslie Francisco nga usa usab ang natalang namatay sa insidente nga giila nga si Luzviminda Magbutong, 38 anyos, duha ang angol nga sila Adrian Magbutong, 40 anyos ug Rhea Magbutong, 20 anyos.
Segun ni Francisco nga pipila sa mga gihikling nga mga residente sa maong mga lugar ang namalik na sa ilahang mga pinuy-anan.
Pasidaan niini sa mga katawhan nga mag-igmat ug maminaw sa mga advisories ug flood warning.
Gisuspende usab ang klase sa munisalidad sa Manay, Davao Oriental ug CARAGA.
Nihimo og clearing operations ang Department of Public Works and Highways(DPWH) Engineering Office uban ang LDRRMC sa mga unpassable portion sa national highways sa Brgy. Cabagayan, Tarragona ug Barangay Santiago tungod sa nahitabong pagdahili sa yuta.
Nakasinati usab og minor flooding ang Brgy. Santiago ug Sitio Papag sa Brgy. Poblacion, Caraga sumala sa PDRRMO Davao Oriental.
Sa pikas bahin, sumala sa OCD XI nga passable ang 3 lanes sa Brgy. Pasian, Monkayo, ComVal ug on going gihapon ang rehabilitasyon sa maong kalsada.
Nakabalik na pod ang mga apektadong residente sa Brgy. Poblacion sa Nabunturan ug Mt. Diwata, Monkayo, Compostela Valley Province kinsa nag-preemptive evacuation.
RadyoMaN Aimee Guinita
