Davao City – Rekomendado na sa Davao City Disaster Risk Reduction Management Office (CDRRMO) ngadto sa tanang eskwelahan ang paglusad sa nagkadaiyang mga emergency drills dili lamang alang sa earthquake ug nga himoong regular tungod kay bulnerable ilabina sa linog ang mga estudyante.
Sumala ni CDRRMO Operations Head Rodrigo Bustillo, sa pribado ug publikong tulonghaan aduna na silay gimugnang Disaster Action Teams (DATs) nga mao nay magpahigayon sa mga drills ug uban pang kalihukan isip kabahin sa disaster preparedness.
Gipasabot usab ni Bustillo nga gikinahanglan gayud nga dili ‘ningas kugon’ kun subang-subang ang pagpahigayon sa mga drills ilabi na sa panahon nga walay kalamidad tungod kay taas pa ang panahon sa pagpangandam.
Samtang gipaboran usab ni Bustillo nga himoong mandatory ang paggamit sa ‘hard hats’ kun mga kalo sa mga tinun-an isip kabahin sa pagpangandam diin ang importante mao nga nasayud sila kung unsay himoon atol ug pagkahuman unya sa katalagman.
RadyoMan Bernard Pantallon
