Pilason ang isa ka persona, matapos nga tiruhon sang wala nakilal-an nga mga suspek sa banwa sang Polomolok, pasado alas 7:00 sang aga, kahapon nga adlaw, Enero 5, 2020.
Ginkilala ang biktima kay Ulysis Paez Pitalgo, 55-anyos, may-asawa kag residente sang Purok 9, Brgy Koronadal Proper, Polomolok, South Cotabato.
Sa imbestigasyon sang Polomolok MPS ang biktima kag ang kaupod sini ang nagaistoryahanay sa higad sang dalan sang duha ka mga suspek sakay sa Honda XRM MC, color white ang nag-abot kag gilayon nga gintiro sang backrider ang biktima sang makapila ka bes.
Pagkatapos sang insidente gilayon naman nga nagpalagyo ang mga suspek sakay sa gate away motorcycle padulong sa direksyon sang Purok 2, Brgy Koronadal Proper sa nasambit nga banwa.
Gilayon man nga gindala sa ospital ang biktima kag yara naman sa stable condition nga nakaangkon sang igo sang bala sa likod nga parte sang iya nga hawak.
Nakuha naman sa natabuan sang insidente ang walo ka basyo sang kalibre 45 nga armas luthang.
Sa subong nagapadayon ang imbestigasyon sang Polomolok MPS sa insidente.
