Ginpatpat ni anay Provincial Administrator Manuel “Boy” Mejorada sa RMN Iloilo ang rason sang iya pagpasaka sang kaso nga Dishonesty kag Grave Misconduct sa Ombudsman batok kay Mayor Jed Patrick Mabilog nga ginka-dismiss sang alkalde.
Suno kay Mejorada gingamit ni Mabilog ang iya posisyon sa gobyerno agud makatipon sang madamo nga manggad kag wala man kuno sini gin-declare sa iya Statement of Assets, Liabilities and Net Worth ukon SALN ang aktwal niya nga manggad.
Ginpahayag ni Mejorada nga makatilingala nga nagsaka sang 8.9 million pesos sa sulod sang isa ka tuig ang SALN sang Alkalde humalin sa 59.3 million pesos sadtong tuig 2012.
Suno kay Mejorada nga napaslawan si Mabilog sa pag-eksplikar sang iya nga bahin kag daw kasubong nga indi husto ang panabat sang alkalde pinaagi sa iya counter-affidavit.
Dugang pa ni Mejorada nga daw kasubong nga may naga tum-ok kay Mayor Mabilog sa nasambit nga kaso.
Ginpanugyanan man ni Mejorada ang mga public official nga dapat siguruhon sang mga ini nga may mga dokumento gid nga ipresentar agud pamatud-an kon diin naghalin ang ila mga manggad bangud iya pasakaan sang kaso kon may mga pulitiko nga nagahimo sang indi husto.
(photo from web)
