Manyacul si angcol

14

Calaboso el un vendor de chicharon despues este ya empesa palpa qui palpa conel privado parte del 9 anios de edad bata moher que ez surbina del su esposa adentro del diila casa na Upper Cabatangan del Miercoles madrogada.
Con el suspechao ya conose como si Egardo Salvador y Dayak, 50 anios de edad, casao del mencionao lugar.
Asegun na report del pulis ya aresta con Salvador ayer tambien madrogada durante el follow-up operation ya conduci el maga pulis del Sta. Maria.
Na investigacion ta aparese el bata recio durmi na casa di canda Salvador porcausa subrina este carnal del esposa di Salvador y porcausa tambien del maga anac y nieta del su tiya quien amo pirmi su uban.
Mientras durmido el bata ya lebanta segun si Salvador y ya empesa este palpa qui palpa con el parte del bata y ya precura pa desnuda conele.
Cuando ya disperta el bata ya precura pa si Salvador soborna cen aver serra su boca pero ya lebanta el bata y ya corre bolbe na diila casa que serca lang tamen na lugar.
Dayun ya abisa el bata consu nana el cosa conele ya pasa y nohay sila espera pa largo tiempo ya man derecho sila na Sta. Maria Police Station.
Con Salvador ya puede aresta ayer madrogada y ya pone conele adentro del carcel.
Pero asegun con el bata del mes de Enero este anio mientras ta durmi tamen le na casa di canda Salvador, yah ace asegun entra si Salvador su dedo na parte del bata pero nohay este dayyun abisa consu nana. Maga pulis ta prepara ya el propio caso que ay planta na corte contra con Salvador

Facebook Comments