General Santos City—sa prisohan na nahuwasan sa iyang kahubog ang usa ka gwardya human nga nasikop human kining nagmaoy ug nagpaila pang sundalo sa may Purok Kasilak, Silway, Barangay West, Gensan alas 9:50 ang takna sa gabie, kagahapong adlawa, Pebrero 1, 2018.
Suspek giilang si Ruben Gallera, 22, security guard, ug residenti sa Upper Banualan, Barangay Tambler, Gensan.
Sa inisyal nga imbistigasyon sa Police Station 1 nasuta nga nagmaoy ang suspek sa lugar bitbit ang cal. 38 revolver nga walay bala. Nagpaila matud pang sundalo ang nasangpit.
Gitabangan sa mga residenti sa lugar nga mauwang ang nasangpit tungod sa perwesyong gihatag niini sa mga residenti diin nakaangkon ug mga bn-og ang nahisgutan.
Gilayon man nga mitawag ug pulis ang mga residenti aron iturn-over ang suspek. sa karon anaa na balhog sa silda sa Police Station 1 ang suspek ug gihikay na ang kasong ipasang-at kaniya human kining nakuhaan ug pusil.
