CAPIZ – Gindepensahan sang iya mga kaalyado sa Capiz si anay DILG Secretary Mar Roxas matapos gindalahig sa illegal drug trade sa Western Visayas ni Ricky Serenio, bagman sang Beria Drug Ring sa Negros Occidental.
Ginpahayag ni Capiz 1st District Congressman Emmanuel Billones Sr., nga kabutigan kag wala sang balasehan ang pagdalahig kay Roxas sa illegal drug trade. Suno kay Billones, nga kilala sini si Roxas nga may maayo nga kabubut-on, sinsero kag matinlo ang konsensiya nga matapna ang iligal nga droga sa pungsod gani imposible ang mga akusasyon ni Serenio.
Samtang naghatag man sang iya reaksyon si Capiz Governor Antonio del Rosario, suno diri nga indi mapatihan ang mga akusasyon ni Ricky Serenio. Ginpaathag sang gobernador nga maggaranon kag disente ang pamilya sang anay tiglikom kag wala sa paminsaron ni Roxas nga mag-upod nga illegal nga buluhaton. Suno pa kay del Rosario nga madugay na nga nagaserbisyo si Roxas sa publiko kag wala sang anu man nga mantsa ang pangalan nga ginatipigan sini.
Ginpahayag dugang ni del Rosario nga wala ginasapak kag ginakadlawan lamang sang Partido Liberal ang nasambit nga akusasyon bangud lunsay kabutigan kag politically motivated. Nagapati sanday Billones kag del Rosario nga ginapangitaan lamang sang buho sang administrasyon sanday anay DILG Secretary Mar Roxas kag Senator Franklin Drilon, para matum-ok kag pasibangdan sang mga akusasyon nga wala sila sang kahilabtanan bangud kilala ang mga ini nga oposisyon sang administrasyon ni Presidente Duterte.
