Nahimong instant celebrity karon didto sa lungsod sa Lala, Lanao del Norte ang usa ka Maranao nga tricycle driver, dihang gipili niyang i-uli ang kapin 20 mil pesos (P20,000) nga kantidad sa kwartang iyang napunitan samtang namasahero.
Midayeg ang iyang mga kaubang driver ug mga kaila, lakip na ang mga opisyal sa kagamhanang lokal sa lungsod sa Lala, Lanao del Norte, tungod kay wala natintal si Jahiden Ampatua Radiamoda nga ibulsa ang kwartang iyang napunitan sa may divisoria sa lungsod.
Kini bisan paman sa kalisod sa panahon tungod sa limitado nga lihok tungod sa pandemya ug duna pa siyay bayrunon nga utang sa pagpatambal ug pagpalubong sa iyang amahan.
Wala na naglaum ang tag-iyang si Noahnie Bayquin nga mabalik pa sa iyaha ang kwarta nga pambayad unta sa supplier sa iyang gamay’ng negosyo nga ukay-ukay.Nahulog kini sa iyang anak samtang paingon sa remittance center aron ipadala ngadto sa iyang supplier.
Gihiktan lang kini og lastiko, walay pangalan, walay contact number.
Nag-post siya sa social media aron ipanawagan sa panghinaut nga mamilagruhan ug ma-uli kini.
Nakuratan nalang siya dihang gitawagan siya ni Radiamoda nga naa kaniya ang kwarta ug magkita sila sa munisipyo aron didto ihatag ang salapi. (Divina M. Suson, February 10)
