Davao City- Bisan pa man gideklara kaganina ni Presidente Rodrigo Duterte nga gawasnon na ang Marawi City human napatay ang duha ka lider sa Maute group nga si Isnilon Hapilon ug Omar Maute, sa panan-aw sa usa ka Kapitan sa Brgy. dinhi sa syudad sa Davao, dili pa gihapon niya maingon nga gawasnon na kini.
Sumala ni Brgy. Captain Roberto Itdang sa Brgy. Salaysay, Marilog District ning syudad atol sa interview sa DXDC RMN Davao nga duna gihapoy dagkong mga tawo ang nagpaluyo ug duna pa gihapoy nahibilin nga ubang mga lider sa grupong Maute bisan napatay na ang nasangpit nga duha ka dagkong lider.
Dugang ni Itdang nga hangtod sa dili madakpan ug dili mahurot ang mga miyembro sa mga nanghasi og kasamok sa Marawi lakip na ang mga nagpaluyo niini, dili pa gihapon maingon nga gawasnon ang nasangpit nga lugar.
Kahinumduman nga gideklara kaganina sa pamuno-nasud nga gawasnon na ang battle area gikan sa kamot sa mga terorista apan dili pasabot nga undangon sa tropa sa gobyerno ang ilang operasyon, padayon gihapon nga himuon sa kasundaluhan ang pagtugis sa mga nahibiling miyembro sa Maute group.
“I hereby declare Marawi City liberated from the terrorist influence that marks the beginning of rehabilitation of Marawi,” sigun ni Pres. Duterte.
RadyoMan Renz Barbarona
